ރ.ވާދޫގައި ޕާޓީ ރޫހް ގާތް ތިމާގެކަމަށްވުރެ ވަރުގަދަ

ޒަމާނުއްސުރެ ވާދޫ ރައްޔިތުންނަކީ އެކުވެރި އެއްބައިވަންތަ ބައެކެވެ. އެކަކުއަނެކަކަށް ޖެހޭ ކަންތައްތަކުގައި އެހީވެދީ އުޅުމަކީ ވާދޫ ރައްޔިތުން ލޯބިކުރާކަމެކެވެ. އެއްގޭ ބަދިގޭން އަނެއްގޭ ބަދިގެއިން ގަރުދިޔަ ބޯތަށި ހިފައިގެން ހިނގި ޒަމާން އަދިވެސް އާވެއެވެ. ނަމަވެސް މިއަދު މި އެކުވެރިކަން ވެއްޔާ މޮޑެވި ހިނގައްޖެއެވެ. އާއިލާތަށް ޖެހިއްޖެއެވެ. ރަޙްމަތްތެރިން ގެއްލިއްޖެއެވެ. މައިންނާ ދަރީން ދެބަސްވެއްޖެއެވެ.
ހިތާމަހުއްޓެވެ. މިއަދު މުޅިރަށް ސިޔާސީ ވެއްޖެއެވެ.   ޕާޓީތަކަށް ރަށް ބައި ބައި ވެއްޖެއެވެ. ޕާޓީއެއްގަ ނަންނެތަށް އެންމެންނަކީވެސް އެތެރެ ފުށުންނާއި ބޭރު ފުށުން ޕާޓީވެފަތިބި މީހުންނެވެ. އެއްބަޔަކު އެމް.ޑީ.ޕީ ވެފައެވެ. އަނެއް ބަޔަކު ޑީ.އާރު.ޕީ ވެފައެވެ. މައި މީހާ ޑީ.އާރޫ.ޕީގައެވެ. ދަރިފުޅު އެމް.ޑީ.ޕީގައެވެ.މައިން ދަރިންނަށް އަނގައިން ބުނަނީކީ ނޫނެވެ. ދަރީން މައިންނަށް އަނގައިން ބުނަނީކީ ނޫނެވެ. މިއަށްވުރެ ވަކީން ދެރަކަމެއްވޭ ހެއްޔެވެ.
ވިސްނާށެވެ. ކޮންމެ މީހަކަށްވެސް އެ މީހަކު ތާއީދުކުރާ ޕާޓީއަކަށް އުޅުމުގެ މިނިވަންކަން އެބައޮތެވެ. ދަރިފުޅު ހުރީ އެމް.ޑީ.ޕީ ގައިކަމަށްވަތީ މައިމީހާ ދަރިފުޅަށް ވާހަކަ ނުދައްކާ ނުހުންނާށެވެ. ހަމަ އެގޮތަށް ދަރިފުޅުވެސް މައިންނަށް ހިތްބުރަނުކޮށް މަންމަ ތާއީދުކުރާ ޕާޓީއަށް މަންމަ ތާއީދުކުރިޔަ ދޭށެވެ. މަންމައާ ޒުވާބު ނުކުރާށެވެ. ދެބަސް ނުވާށެވެ. ތިމާ ތާއީދުކުރާ ޕާޓީގަ ގޯސްކަމެއް އޮވެއްޖެ ނަމަ އެކަމެއް އެއީ ގޯސްކަމެއްގެ ގޮތުގައި ދެކޭށެވެ. ތިމާ ތާއީދު ކުރާ ޕާޓީން އިންތިހާބަށް ނިކުންނަނީ ގާބިލް މީހެއްކަމުގައި ނުވަނީ ނަމަ އެމީހަކަށް ވޯޓް ނުދޭށެވެ. ތިމާ ތާއީދު ކުރަނީ އެމް.ޑީ.ޕީއަށް ކަމަށްވިޔަސް ރައީސް ނަޝީދު ގޯސްކަމެއް ކުރައްވައިފިނަމަ އެކަމަކަށް ތާއީދު ނުކުރާށެވެ. ހަމައެގޮތަށް ރ.ވާދޫ ކައުންސިލްގެ އިދާރާއިންވެސް ގޯސްކަމެއްކޮއްފިނަމަ އެކަމަކަށް ތާއީދުނުކުރާށެވެ. ތިމާގެ މުސްތަގުބަލް އުޖާލާވާނީ ތިމާގެ ގައުމާއި ތިމާދިރިއުޅޭ ރަށެއް ތަރައްގީވެގެންނެވެ. ވީއިރު  ކޮންމެ ޕާޓީއެއްގެ ބަޔަކު ގޮވާލިޔަސް އެ ގޮވާލަނީ ރައްޔިތުންނަށް ފައިދާހުރި ކަމަކަށް ކަމުގައި ވަނީނަމަ އެކަމަކަށް އިޖާބަދޭށެވެ.